Ես Ալբերտ Խաչատրյանն եմ։ Բնակվում եմ Ֆրանսիայի Օշ քաղաքում։

Սոցիալ-մարզական ծրագրերի մասնագետ եմ։ Մշակում և իրականացնում եմ սոցիալ-մարզական նախաձեռնություններ, որոնք սպորտը դարձնում են երիտասարդների զարգացման, սոցիալական ներառման և համայնքային համերաշխության խթանման արդյունավետ գործիք։ Իմ աշխատանքում կարևոր տեղ են զբաղեցնում մարդկային հարաբերությունների ամրապնդումը և հասարակական պատասխանատվության ձևավորումը։

Ակտիվորեն ներգրավված եմ Օշի համայնքային կյանքում և մասնակցում եմ տարբեր սոցիալական նախաձեռնությունների։ Զբաղվում եմ միջոցառումների կազմակերպմամբ, երիտասարդների ներգրավմամբ և համայնքային կապերի ամրապնդմամբ։ Միաժամանակ հանդիսանում եմ Թուլուզի և Միդի-Պիրենեի հայկական խորհրդի անդամ՝ մասնակցելով հայկական համայնքային կյանքի զարգացմանն ուղղված նախաձեռնություններին։

Իմ հիմնական համայնքային նպատակներից է Օշ քաղաքում հայկական համայնքի ձևավորումը և տարածաշրջանում բնակվող հայերի համախմբումը։ Քաղաքում ներկայումս գործող հայկական համայնք կամ միավորում չկա, և ցանկանում եմ նախաձեռնել դրա ստեղծումը՝ ձևավորելով հարթակ, որտեղ հայերը կկարողանան հանդիպել, շփվել, համատեղ կազմակերպել մշակութային և համայնքային միջոցառումներ, ինչպես նաև պահպանել և երիտասարդ սերնդին փոխանցել հայկական մշակույթը, լեզուն ու ավանդույթները։

Որպես «Սփյուռքի երիտասարդ դեսպան»՝ նպատակ ունեմ զարգացնել նորարարական ծրագրեր, որոնք նոր հնարավորություններ կստեղծեն երիտասարդների համար և կնպաստեն առավել ներառական ու ակտիվ հասարակության ձևավորմանը։ Ցանկանում եմ նաև ամրապնդել Հայաստանի և Սփյուռքի միջև կապերը և զարգացնել համագործակցությունը Օշի, տեղական կառույցների և Հայաստանի միջև՝ հատկապես երիտասարդության, սպորտի, մշակույթի և կրթության ոլորտներում։