Ես Րաֆֆի Խուդավերդյանն եմ։ Ծնվել եմ Հայաստանում, իսկ տասը տարեկանից ընտանիքիս հետ բնակվում եմ Բելգիայում, որտեղ ձևավորվել է իմ մասնագիտական ուղին։

Ունեմ օրգանական քիմիայի մագիստրոսի աստիճան։

Ներկայումս Բելգիայում աշխատում եմ որպես հետազոտությունների և զարգացման (R&D) քիմիկոս։ Մասնագիտացած եմ կայուն և կենսահումքի վրա հիմնված նյութերի մշակման ոլորտում՝ թանաքների, ծածկույթների և ներկերի արտադրության համար։ Մասնագիտական գործունեությունս զարգացրել է իմ հետազոտական, նորարարական և խնդիրների լուծման հմտությունները, ինչպես նաև ամրապնդել գիտելիքների փոխանակման և համագործակցության կարևորության ընկալումը։

Ակտիվորեն ներգրավված եմ Բելգիայի հայկական համայնքի կյանքում՝ հատկապես Անտվերպենի Հայ Առաքելական եկեղեցու համայնքում։ Համայնքի անդամների և ղեկավարների հետ համագործակցության միջոցով ձգտում եմ ավելի լավ ճանաչել Ֆլանդրիայում բնակվող հայերի կարիքներն ու համայնքային առաջնահերթությունները։

Որպես «Սփյուռքի երիտասարդ դեսպան»՝ նպատակ ունեմ ամրապնդել Բելգիայի, հատկապես Ֆլանդրիայի, հայկական համայնքի և Հայաստանի միջև կապերը, խթանել երիտասարդների ներգրավվածությունը, աջակցել մշակութային և կրթական նախաձեռնություններին, ինչպես նաև նպաստել Հայաստանի և Սփյուռքի միջև կայուն մասնագիտական ու անձնական համագործակցության ձևավորմանը։