Ես Տիգրան Ղալումյանն եմ։ Ներկայումս բնակվում եմ Հունաստանի Աթենք քաղաքում։

Մասնագիտությամբ տնտեսագետ եմ և քաղաքացիական ներգրավվածության ոլորտի մասնագետ։ Տնտեսագիտության բակալավրի աստիճանս ստացել եմ Աթենքի ազգային և Կապոդիստրիական համալսարանում։

Մասնագիտական գործունեությունս ծավալում եմ միջազգային համագործակցության, հանրային քաղաքականության և քաղաքացիական հասարակության ոլորտներում։ Մասնակցել եմ պետական կառույցների, համայնքապետարանների, դեսպանությունների, վերլուծական կենտրոնների, համալսարանների և միջազգային կազմակերպությունների հետ համատեղ իրականացվող ծրագրերի ու նախաձեռնությունների՝ նպաստելով Հայաստանի, Հունաստանի և Եվրոպական միության միջև համագործակցության ամրապնդմանը։

Ակտիվորեն ներգրավված եմ Հունաստանի հայ համայնքի կյանքում՝ որպես Հունաստանի հայերի միության խորհրդի անդամ։ Մասնակցում եմ համայնքային ներգրավվածությունը խթանող, հայկական ինքնության պահպանմանն ու Հայաստանի և Սփյուռքի միջև համագործակցության զարգացմանն ուղղված նախաձեռնությունների իրականացմանը։

Որպես «Սփյուռքի երիտասարդ դեսպան»՝ նպատակ ունեմ ամրապնդել Հայաստանի և Հունաստանի հայկական համայնքի միջև կապերը, զարգացնել երիտասարդների համագործակցությունը և նպաստել նոր համատեղ նախաձեռնությունների ձևավորմանը։ Ծրագրի միջոցով ցանկանում եմ փորձի փոխանակում ունենալ տարբեր երկրների երիտասարդ հայերի հետ, ստեղծել իմաստալից գործընկերություններ և արժանապատվորեն ներկայացնել Հունաստանի հայ համայնքը՝ նպաստելով հայ-հունական կապերի հետագա զարգացմանը։