2023 թվականի օգոստոսի 1-3-ը Հայաստանի մայրաքաղաք Երևանում կանցկացվի Ազգային երիտասարդական առաջին համաժողովը, որին նախատեսվում է 400 մասնակցի ներկայություն սփյուռքից, Հայաստանից և Արցախից: Համաժողովը կազմակերպվում է ՀՀ սփյուռքի գործերի գլխավոր հանձնակատարի գրասենյակի կողմից` նպատակ ունենալով համախմբել սփյուռքի երիտասարդական ներուժը և ստեղծել իստիտուցիոնալ հիմքեր հետագա համագործակցության համար: Հավաքը Հայաստանին և սփյուռքին հնարավորություն կտա բացահայտել երկկողմ առաջնահերթությունները, համադրել օրակարգերը և մշակել ռազմավարական մոտեցումներ:

Համաժողովին մասնակցելու համար հրավիրվելու են սփյուռքյան երիտասարդական, համայնքային, ուսանողական, կրթամշակութային, մասնագիտական կառույցների և ոլորտների այն ներկայացուցիչները, որոնք 18-35 տարեկան են, ակտիվ են Հայաստան-սփյուռք հարաբերությունների տարբեր շրջանակներում, նպատակ ունեն զարգացնել իրենց գործունեությունը և ստեղծել նոր կապեր Հայաստանի, Արցախի և սփյուռքի այլ համայնքների հետ:

Նախատեսվում է համաժողովի ընթացքում ունենալ պանելային և ազատ ձևաչափի քննարկումներ, աշխատաժողովներ, պրեզենտացիաներ, էքսպոներ, հանդիպումներ, ինչպես նաև մշակութային ծրագրեր:

Սփյուռքի համայնքներում ակտիվ ներգրավված երիտասարդ գործիչները, մասնագիտական խմբերի ներկայացուցիչները, համահայկական, երիտասարդական կառույցների անդամները, ովքեր հետաքրքրված են համաժողովին մասնակցությամբ, կարող են լրացնել հայտադիմումը ՝ https://forms.gle/u27KbzBZwyLV8PcFA:

Հարցերի դեպքում կարող եք գրել youthforum@gov.am էլ. հասցեին: