ՀՀ նախագահի նստավայրում տեղի է ունեցել Տիգրան Իզմիրլյանին Հայրենիքի շքանշանով պարգևատրելու հանդիսավոր արարողությունը՝ ՀՀ բարձրաստիճան պետական պաշտոնյաների մասնակցությամբ։

Հանրապետության նախագահ Վահագն Խաչատուրյանը Հայրենիքի շքանշանը հանձնել է Տիգրան Իզմիրլյանի որդուն՝ Սարգիս Իզմիրլյանին։ 

Նախագահն իր խոսքում ընդգծել է Իզմիրլյան ընտանիքի  մեծագույն ավանդը հայապահպանության, կրթության, առողջապահության և հայրենիքի բազմաթիվ այլ ոլորտներում:

«Մեզ շատ երկար ժամանակ կպահանջվի, որպեսզի թվարկենք 1990 թվականից ի վեր Իզմիրլյան հիմնադրամի կողմից իրականացված ծրագրերն ու նախաձեռնությունները, որոնք հենց ասվածի վկայությունն են: Հայ ժողովուրդն արդեն իսկ գնահատել է Իզմիրլյան ընտանիքի հայրենանվեր գործունեությունը՝ արժանացնելով նրանց իր ջերմ ու անվիճարկելի սիրուն և հարգանքին:  Բայց միևնույն ժամանակ մեր պետությունը և պետական պաշտոնյաներս յուրատեսակ պարտականություն ունենք արժանին մատուցել, գնահատել և պարգևատրել մեր երկրի և ժողովրդի մեծ բարեկամներին ու արժանավոր որդիներին», - նշել է Հանրապետության նախագահը:

Հայրենիքի շքանշանը հանձնվում է «Հայաստանի ազգային հերոս» բարձրագույն կոչմանն արժանացած անձանց: