ՀՀ սփյուռքի գործերի գլխավոր հանձնակատար Զարեհ Սինանյանը որպես բանախոս հանդես է եկել «ԴիջիԹեք 2024» տեխնոլոգիական ցուցահանդեսի շրջանակում կազմակերպված «DigiTalks» ձևաչափի քննարկմանը, որը կրել է «Գիտության և տեխնոլոգիաների զարգացումը՝ օգտագործելով սփյուռքի ընդարձակ ցանցը» խորագիրը։

Որպես բանախոսներ քննարկմանը մասնակցել են նաև բարձր տեխնոլոգիաների ոլորտի ձեռներեց և ներդրող Ադամ Կաբլանյանը և «Metacomp Technologies Inc» ընկերության տեխնոլոգիական տնօրեն  Օշին Փերումյանը։ Քննարկումը վարել է «Այբ» կրթական հիմնադրամի հոգաբարձուների խորհրդի նախագահ Արամ Փախչանյանը։

Զարեհ Սինանյանն իր խոսքում անդրադարձել է գիտության և տեխնոլոգիաների ոլորտում սփյուռքի ներուժի ներգրավմանն ուղղված պետական ծրագրերին, խոսել գիտության և տեխնոլոգիական ոլորտներում հայկական սփյուռքի հետ համագործակցության ձևաչափերի և նոր նախաձեռնությունների մասին, ինչպես նաև պատասխանել հանդիսատեսի հարցերին։

«ԴիջիԹեք»-ը Հայաստանում անցկացվող ամենամեծ տեխնոլոգիական ցուցահանդեսն է՝ հագեցած ՏՏ նորագույն լուծումների, ինժեներական ներուժի ներկայացումներով, մասնագիտական սեմինար-քննարկումներով։ Այս տարի «ԴիջիԹեք»-ն անցկացվել է հոկտեմբերի 4-ից 6-ը։