ՀՀ սփյուռքի գործերի գլխավոր հանձնակատար Զարեհ Սինանյանը և գրասենյակի աշխատակիցներն այցելել են «M.A.M.» կրթական շարժման գրասենյակ: 

Կրթական շարժման հիմնադիրներ Մարինե և Մելինե Ղազարյանների ուղեկցությամբ Գլխավոր հանձնակատարը շրջել է հաստատության տարածքով, ծանոթացել իրականացվող ծրագրերին և նորարար տեխնոլոգիաներով հագեցած առցանց դասընթացներին:  

Զարեհ Սինանյանը ողջունել է  «M.A.M»-ի գործունեությունը՝ կարևորելով սփյուռքում  հայերենի, պատմության և մշակույթի պահպանմանն  ուղղված շարժման ջանքերը: 

«Կարևոր  է, որ սփյուռքում բնակվող մեր հայրենակիցներն այսօր հնարավորություն ունեն առցանց սովորելու հայոց լեզուն՝ պահպանելով իրենց ինքնությունն ու կապը հայրենիքի հետ»,- նշել է Զարեհ Սինանյանը: 

 «M.A.M»-ի հիմնադիրներն իրենց հերթին կարևորել են գրասենյակի հետ ձևավորված սերտ համագործակցությունը, ինչպես նաև պատրաստակամություն հայտել աջակցելու սփյուռքի  հայկական կրթօջախներին և ուսուցիչներին՝ կիսվելով մայրենիի դասավանդման ժամանակակից մեթոդներով և սեփական փորձով:

Հանդիպման ավարտին պայմանավորվածություն է ձեռք բերվել շարունակելու երկկողմ  համագործակցության խորացմանն ուղղված աշխատանքները: