ՀՀ սփյուռքի գործերի գլխավոր հանձնակատար Զարեհ Սինանյանն աշխատանքային այցով գտնվում է Ֆրանսիայի Հանրապետությունում։

Մայիսի 21-ին Նիցցայում, Ֆրանսիայում ՀՀ սփյուռքի գործերի հանձնակատար Վահագն Մովսեսյանի ուղեկցությամբ, Զարեհ Սինանյանն այցելել է Նիցցայի Պարսամյան վարժարան, որտեղ հանդիպել է տեղի հայ համայնքի երիտասարդների հետ։

Հանդիպման ընթացքում գլխավոր հանձնակատարը ներկայացրել է Գրասենյակի կողմից իրականացվող ծրագրերն ու առաջիկա միջոցառումները, ինչպես նաև պատասխանել է ներկաների հարցերին։

Երիտասարդները հետաքրքրվել են ծրագրերին մասնակցության պայմաններով, այդ թվում՝ հայրենադարձության և ինտեգրման փորձառություններով, ինչպես նաև այս տարվա օգոստոսի 5-7-ը Երևանում կայանալիք Ազգային երիտասարդական համաժողովով։

Նույն օրը Զարեհ Սինանյանը հանդիպել է նաև Արվեստի և մշակույթի ֆրանս-հայկական կենտրոնի միջազգային հարցերով համակարգող, «Պարսամյան» վարժարանի հոգաբարձուների խորհրդի նախագահ Կիրկոր Աժդերհանյանի գլխավորած պատվիրակությանը։

Հանդիպման ընթացքում քննարկվել են մշակույթի ոլորտում Հայաստան–Սփյուռք համագործակցության հնարավորությունները։

Կիրկոր Աժդերհանյանը Գլխավոր հանձնակատարին ներկայացրել է Համաշխարհային հայկական արվեստի և մշակույթի փառատոն անցկացնելու վերաբերյալ կենտրոնի նախագիծը։

Կողմերը քննարկել են հայկական մշակույթի զարգացմանն ու տարածմանը, դրա շուրջ Սփյուռքի ներուժի միավորմանը, ինչպես նաև փառատոնի կազմակերպմանն առնչվող մի շարք հարցեր։