ՀՀ սփյուռքի գործերի գլխավոր հանձնակատարն աշխատանքային այցով Ֆրանսիայում է
22 Ապրիլի 2026
ՀՀ սփյուռքի գործերի գլխավոր հանձնակատար Զարեհ Սինանյանն աշխատանքային այցով Ֆրանսիայում է։
Ապրիլի 22-ին Զարեհ Սինանյանն աշխատանքային այցի շրջանակում այցելել է Մեցի Ֆրանսիական պետական տարածաշրջանային կառավարման ինստիտուտ (IRA), որտեղ հանդիպել է կառույցի ղեկավար Ժան-Մարկ Սիրի և աշխատակազմի հետ։
Հանդիպման ընթացքում Զարեհ Սինանյանը ծանոթացել է ինստիտուտի գործունեությանը, կատարել շրջայց ռեսուրսային կենտրոնում: Քննարկվել են Հայաստանի հետ հնարավոր համագործակցության հեռանկարները։
Օրվա երկրորդ կեսին Գլխավոր հանձնակատարը մեկնել է Ֆորբախ քաղաք, որտեղ հանդիպում է ունեցել Ֆորբախի քաղաքապետ Ալեքսանդր Կասսարոյի հետ։
Հանդիպման ընթացքում Զարեհ Սինանյանը շնորհավորել է քաղաքապետին վերընտրվելու կապակցությամբ և շնորհակալություն հայտնել հայ համայնքին ցուցաբերվող շարունակական աջակցության համար՝ ընդգծելով դրա կարևորությունը համայնքի սոցիալական ինտեգրման և զարգացման հարցում։
Կողմերը կարևորել են Ֆրանսիայում, մասնավորապես՝ Ֆորբախում, հայ համայնքի դերը՝ որպես հաջողված ինտեգրման օրինակ, որտեղ հաղթահարվում են մշակութային և լեզվական խոչընդոտները՝ միաժամանակ պահպանելով ազգային ինքնությունը։
Անդրադարձ է կատարվել նաև հայ-ֆրանսիական ապակենտրոնացված համագործակցության շարունակական զարգացմանը՝ ընդգծելով Ֆորբախի և Հայաստանի համայնքների միջև առավել սերտ կապերի հաստատման անհրաժեշտությունը։
Գլխավոր հանձնակատարը նշել է, որ Հանձնակատարի գրասենյակը հանդիսանում է արդյունավետ ինստիտուցիոնալ կամուրջ Ֆրանսահայ համայնքի և Հայաստանի միջև՝ նպաստելով մշակութային, կրթական և սոցիալական ոլորտներում համագործակցության ընդլայնմանը։
Այցի ընթացքում Զարեհ Սինանյանը գրառում է կատարել Ֆորբախի քաղաքապետարանի պատվավոր հյուրերի մատյանում։
Քաղաքապետարանում հանդիպումից հետո Գլխավոր հանձնակատարը հանդիպել է Ֆորբախի հայ համայնքի ներկայացուցիչների հետ, ներկայացրել Գրասենյակի գործունեությունն ու ընթացիկ ծրագրերը, որին հաջորդել է հարցուպատասխան։
Հարցերը հիմնականում վերաբերել են Հայաստանի անվտանգությանը, հայ-ֆրանսիական համագործակցությանը, հայրենադարձությանը, սփյուռքի համայնքների հետ կապերի զարգացմանն ու ամրապնդմանը, ինչպես նաև Հայաստանի սոցիալ-տնտեսական զարգացման առաջնահերթություններին։
