Օգոստոսի 24-ին Երևանում մեկնարկել է ՀՀ սփյուռքի գործերի գլխավոր հանձնակատարի գրասենյակի «Սփյուռքի երիտասարդ դեսպան» ծրագիրը, որն իրականացվում է արդեն վեցերորդ անգամ։

Ծրագրի նպատակն է սփյուռքահայ երիտասարդներին հնարավորություն ընձեռել խորացնելու իրենց պատկերացումները Հայաստանի քաղաքական, սոցիալական, տնտեսական և հասարակական գործընթացների մասին, խթանել նրանց ակտիվ ներգրավվածությունը համայնքային կյանքում, նպաստել նոր գիտելիքների, հմտությունների և գործնական կապերի ձևավորմանը, ինչպես նաև ամրապնդել Հայաստանի և սփյուռքի տարբեր համայնքների երիտասարդների միջև համագործակցությունը։

2026–2027 թվականների շրջափուլին մասնակցում է 29 երիտասարդ՝ աշխարհի 17 երկրից։

Ծրագրի բացման արարողությանը ողջույնի խոսքով հանդես են եկել ՀՀ սփյուռքի գործերի գլխավոր հանձնակատար Զարեհ Սինանյանը, ծրագրի ղեկավար Լիլիթ Խաչատրյանը, Հայրենադարձության և ինտեգրման կենտրոնի ղեկավար Հովհաննես Ալեքսանյանը, ինչպես նաև ծրագրի շրջանավարտներն ու մասնակիցները։

Ողջունելով երիտասարդներին՝ Զարեհ Սինանյանը նշել է.

«Այս տարիների ընթացքում մեզ հաջողվել է ձևավորել Սփյուռքի երիտասարդ դեսպանների ցանց, որի անդամները Հայաստանը ճանաչում են ոչ միայն զգացմունքով, այլև գործնական փորձով։ Նրանք իրենց համայնքներում դառնում են Հայաստանի արժանի ներկայացուցիչներ։ Ծրագրի ընթացքում և դրանից հետո ևս մենք լինելու ենք ձեր կողքին՝ որպես գործընկերներ»։

Միջոցառման շրջանակում Գլխավոր հանձնակատարը հավաստագրեր է հանձնել «Սփյուռքի երիտասարդ դեսպան» ծրագրի 2025–2026 թվականների շրջափուլի մասնակիցներին։

Ծրագրի ընթացքում երիտասարդները 13 օր կանցկացնեն Հայաստանում՝ մասնակցելով հատուկ մշակված կրթական ծրագրի, որը ներառում է դասախոսություններ, աշխատաժողովներ, հանդիպումներ պետական և մասնավոր հատվածի ներկայացուցիչների հետ, ինչպես նաև փորձի փոխանակման միջոցառումներ։

Մասնակիցները կայցելեն պետական, գիտակրթական, մշակութային և հոգևոր հաստատություններ, հիշատակի վայրեր, ինչպես նաև Հայաստանի Հանրապետության մարզեր՝ տեղում ծանոթանալով երկրի զարգացման տարբեր ուղղություններին։

Դասընթացի ավարտից հետո յուրաքանչյուր մասնակից մեկ տարվա ընթացքում իր համայնքում կիրականացնի ծրագրով նախատեսված նախաձեռնություններ՝ նպաստելով Հայաստանի և սփյուռքի միջև կապերի ամրապնդմանն ու երիտասարդական համագործակցության զարգացմանը։