Սփյուռքի երիտասարդ դեսպան ծրագրի մասնակիցները հանդիպում ունեցան ՀՀ արտաքին գործերի նախարարի տեղակալ Պարույր Հովհաննիսյանի հետ, ով ներկայացրեց ՀՀ արտաքին քաղաքականության օրակարգային հարցերը, ինչպես նաև անդրադարձ կատարեց տարածաշրջանային զարգացումներին, հեռանկարներին և մի շարք այլ հարցերի:

Քաղաքական խորհրդատու Էրիկ Հակոբյանի հետ հանդիպմանը երիտասարդ դեսպանները հնարավորություն ունեցան տեղեկանալու Հայաստանի քաղաքական վերջին զարգացումներին, Արցախի պետական նախարար Արտակ Բեգլարյանի հետ առցանց հանդիպմանը՝ Արցախին առնչվող մի շարք հարցերի:

Մասնակիցներն այցելեցին Ծիծեռնակաբերդի հուշահամալիր, հարգանքի տուրք մատուցեցին Հայոց ցեղասպանության զոհերի հիշատակին, ապա այցելեցին Հայոց ցեղասպանության թանգարան-ինստիտուտ:

Մասնակիցների համար առանձնահատուկ նշանակություն ուներ Եռաբլուր զինվորական պանթեոն այցելությունը: Սրբոց Վարդանանց Նահատակաց եկեղեցում ՀՀ ԶՈՒ հոգևոր առաջնորդության գնդերեց Տեր Վարազդատ քահանա Նաջարյանի կողմից անցկացվեց հոգեհանգստյան կարգ, որից հետո մասնակիցները հարգանքի տուրք մատուցեցին մեր հերոսացած տղաների շիրիմներին: