Դանիայում հայերը հաստատվել են 1970-ական թվականներից՝ գաղթելով հիմնականում Հայաստանից, Իրանից և Իրաքից` բնակություն հաստատելով Կոպենհագեն և Օրհուս քաղաքներում։ Ներկայումս երկրում բնակվում է շուրջ 3000 հայ:

Հայերը հիմնականում ներգրավված են առողջապահության, տեղեկատվական տեխնոլոգիաների, մշակույթի ոլորտներում և սպասարկման տարբեր ճյուղերում, մեծ թիվ են կազմում մտավորականները:

Դանիայում 1983 թ. իրանահայերի և լիբանանահայերի ջանքերով ստեղծվել է Հայ մշակութային միությունը, որի գործունեությունը հետագայում դադարեցվել է:

2005 թվականից սկսած` Դանիայի հայ համայնքային կյանքը հիմնականում ակտիվացրել են «ԴանԱրմեն» հայ-դանիական ասոցիացիան և «Նեկտար» մշակութային ընկերությունը, հետագայում նաև «Արարատ» միությունը, գործում են նաև մի քանի հայկական մեկօրյա դպրոցներ:

Դանիայում համայնքը փոքրամասնության իրավական կարգավիճակ չունի:

Երկրում հայկական եկեղեցի չկա, համայնքի հոգևոր կարիքները հոգում է Կենտրոնական Եվրոպայի հայրապետական պատվիրակությունը: