Ես Փրեդիթա Ղարիբեանն եմ, 25 տարեկան։ Ծնվել և մեծացել եմ Իրանի Իսլամական Հանրապետության մայրաքաղաք՝ Թեհրանում։

Միջնակարգ ուսումս ստացել եմ հայկական դպրոցում, իսկ համալսարանում մասնագիտացել եմ էլեկտրատեխնիկայի՝ կենսաբժշկական ճարտարագիտության ոլորտում։ 2021 թվականից աշխատում եմ Advance Medtronic հայկական ընկերությունում՝ որպես լաբորատորիայի սարքավորումների տեխնիկ։

2018 թվականից անդամակցում եմ Հայ Ուսանողական Միությանը և երեք տարի ղեկավարել եմ դրա հասարակագիտական բաժանմունքը։ 2009 թվականից ներգրավված եմ սկաուտական շարժման աշխատանքներում։ Մինչև այսօր նաև եղել եմ Հայ Առաքելական Եկեղեցու կիրակնօրյա դպրոցի սան և աշխատել որպես սկսնակ ուսուցչուհի։

Մեր սփյուռքահայ համայնքը կանգնած է բազմաթիվ մարտահրավերների առաջ, հատկապես երիտասարդության սահմանափակ մասնակցության առումով մշակութային ոլորտներում։ Համոզված եմ, որ ճիշտ ուղղորդմամբ և միասնական ջանքերով մենք ոչ միայն կպահպանենք մեր ինքնությունը, այլև կզարգացնենք համայնքային կյանքը։ «Սփյուռքի երիտասարդ դեսպան» ծրագիրը հենց այդպիսի հարթակ է ինձ և իմ նման մտածող երիտասարդների համար՝ թույլ տալով համախմբվել, գործնական փորձ ձեռք բերել և ամրապնդել հայկական համայնքը։