ՆԿԱՐԱԳՐՈՒԹՅՈՒՆ

Սփյուռքահայ պատանիների և երիտասարդների շրջանում ազգային ինքնության պահպանման և զարգացման նպատակով ՀՀ սփյուռքի գործերի գլխավոր հանձնակատարի գրասենյակը Հայաստանում իրականացնում է «Քայլ դեպի տուն» երկշաբաթյա ուսումնաճանաչողական ծրագիրը:

Ծրագիրը ներառում է.

• 13-օրյա ճամբարային ծրագիր,
• հայոց լեզվի դասընթացներ (արևելահայերեն, արևմտահայերեն),
• հայրենագիտության դասընթացներ,
• ազգային երգի և պարի դասընթացներ,
• ճանաչողական այցելություններ Հայաստանի պատմամշակութային վայրեր, թանգարաններ, կրթական հաստատություններ,
• հանդիպումներ պետական, հասարակական, մշակույթի և արվեստի գործիչների հետ,
• մարզական և մշակութային միջոցառումներ:

Ծրագրի 13-օրյա ժամանակահատվածի բոլոր ծախսերը հոգում է ՀՀ կառավարությունը:

Ծրագրին կարող են մասնակցել 13-18 տարեկան ՀՀ քաղաքացի չհանդիսացող (բացառությամբ՝ երկքաղաքացիություն ունեցողների) սփյուռքահայ այն պատանիները և երիտասարդները, ովքեր

• նախորդ տարիներին չեն մասնակցել «Քայլ դեպի տուն» ծրագրին,
• իրենց հաշվին հոգալու են Հայաստան ժամանման և երկրից մեկնման տրանսպորտային ծախսերը,
• իրենց հաշվին ձեռք են բերելու երկշաբաթյա ճամափորդական ապահովագրություն Հայաստանի Հանրապետությունից:

Կարևոր!

Ապահովագրությունը պետք է ձեռք բերել առցանց տարբերակով՝ հետևյալ ընկերությունից՝ Նաիրի Ինշուրանս:

Այս տարի ծրագիրը կիրականացվի հունիսի 12-ից օգոստոսի 19-ը՝ 5 փուլով: Այս տարվա ծրագիրը նախատեսված է 600 սփյուռքահայ պատանիների համար:

ՀԱՅՏԱԴԻՄՈՒՄՆԵՐ

«Քայլ դեպի տուն» 2026 ուսումնաճանաչողական ծրագրի հայտադիմումների ընդունման վերջնաժամկետն է փետրվարի 25-ը:

Հայտադիմումներն արդեն ընդունվում են:

Դիմելու համար սեղմեք այստեղ: 

*Նախքան ձեր հայտի լրացման գործընթացը սկսելը, խորհուրդ ենք տալիս ձեռքի տակ ունենալ հետևյալ ֆայլերը:

1. Անձնագրի և լուսանկարի պատճեներ (scan),
2. Մոտիվացիոն տեսանյութ մինչև 1 րոպե տևողությամբ (1.Ինչու՞ եք ուզում մասնակցել ծրագրին: 2. Ի՞նչ ակնկալիքներ ունեք: 3.Ի՞նչ կուզեիք բացահայտել ծրագրի միջոցով (մինչև 10 MB)),
3. Տեղեկանք բնակության վայրից (եթե ՀՀ քաղաքացի եք),
4. Տեղեկանք ուսումնական հաստատությունից (բնօրինակը և թարգմանությունը` նոտարական վավերացմամբ):

Հաշվի առնելով տեղերի սահմանափակ քանակը՝ ուզում ենք տեղեկացնել, որ մասնակիցների ընտրությունը կատարվելու է ըստ հայտերի ներկայացման ժամանակագրության և փուլերի:

Ծրագրի մասնակցության կամ մերժման ծանուցումը մասնակիցը կստանա հայտերի ընդունման գործընթացի ավարտից հետո՝  20-օրյա ժամկետում (մարտի 1-20-ը):

Հիշեցնենք, որ ծրագիրը կանցկացվի 5 փուլով՝ հունիսի 12-ից օգոստոսի 19-ը՝

1. Հունիսի 12 - հունիսի 24,
2. Հունիսի 26 - հուլիսի 8,
3. Հուլիսի 10 - հուլիսի 22,
4. Հուլիսի 24 - օգոստոսի 5,
5. Օգոստոսի 7- օգոստոսի 19:

ԶԳՈՒՇԱՑՈՒՄ

Խնդրում ենք զերծ մնալ ավիատոմսերի կամ այլ փոխադրամիջոցի տոմսերի ձեռքբերումից մինչև մեր կողմից պաշտոնական ծանուցում ստանալը: 

ԼՈՒՍԱՆԿԱՐՆԵՐ

ԿԱՐԾԻՔՆԵՐ

«Ծանոթացա տարբեր երկրներից եկած հայ պատանիների հետ: Նրանց հետ կապը մինչ օրս պահպանում եմ և հուսով եմ, որ դեռ երկար ընկերություն կանենք: Հայաստան գալով՝ էլ ավելի լավ ծանոթացա մեր մշակույթին, և վերջապես կատարվեց իմ երազանքը»:

Էդգար Էվոյան, Կիպրոս, 2021

«Այն բոլոր գեղեցիկ վայրերը, որ այցելեցինք, բացահայտում էին ինձ համար: Թե՛ հայոց լեզվի, թե՛ պատմության դասերին մեր ազգի մասին շատ նոր ու կարևոր դրվագներ իմացանք»:

Սոնա Գևորգյան, Իսպանիա, 2021

«Եկա այս ծրագրին, որովհետև ուզում էի հայերեն տառերը սովորել: Ուրախ եմ, որ ծրագրի շնորհիվ նաև հայկական պարեր սովորեցի, որոնք իրոք շատ բան են պատմում Հայաստանի մասին»:

Լևոն Գևորգյան, Նիդերլանդներ, 2021

««Քայլ դեպի տուն» ծրագիրը ինձ դարձրեց ավելի հայրենասեր ու բազմակողմանի զարգացած: Ես իմ քայլն արել եմ, հերթը քոնն է»:

Իզաբելլա Մեյրոյան, ՌԴ, 2019

«Չգիտեմ ինչպես փոխանցեմ այն զգացմունքները և տպավորությունները, որոնք ստացել եմ 14 օրերի ընթացքում: Հիշում եմ ջերմ միջավայրում անցկացրած ամեն մի վայրկյանը և հուզվում: «Քայլ դեպի տուն» ծրագիրը հնարավորություն ընձեռեց  hայրենիքիս ծարավը հագեցնել և հարազատ մարդիկ ձեռք բերել, ովքեր ունեն  իրենց ուրույն անկյունն իմ սրտում»:

Միլենա Պետրոսյան, Վրաստան, 2019

««Քայլ դեպի տուն» ծրագիրը ինձ շատ բան տվեց, հիմա ես արդեն ճանաչում են բազում երկրներից իմ հասակակիցներին, ուրախ եմ, որ ունեմ այս կապերը»:

Էդուարդ Խաչատրյան, ԱՄՆ, 2019

«Ամենակարևորն այն է, որ ծրագրի ընթացքում մենք ուժեղացրեցինք մեր հայերենը, սովորեցինք շատ ու շատ նոր պատմություններ հայ հերոսների, հայկական տոների, Հայաստանի և Արցախի պատմության մասին»:

Վարդան Սամսոնյան, Իրաք, 2019

«Կա արդյո՞ք մի այսպիսի ծրագիր, որտեղ տարբեր երկրներից  միևնույն ազգի հարյուրավոր երիտասարդներ հավաքվեն նույն գաղափարի համար, իսկ այդ գաղափարը Հայրենիքի հետ ծանոթությունն է: Ինձ համար այդպիսի ծրագիր է «Քայլ դեպի տունը»»:

Նունե Գևորգյան,  Ուկրաինա, 2019

«Եկա, որ ավելի լավ ճանաչեմ Հայաստանը: «Քայլ դեպի տուն» ծրագրի շնորհիվ ես արդեն ունեմ շատ ընկերներ»:

Սիրեկան Հովհաննիսյան, Իսպանիա, 2018

ԿՈՆՏԱԿՏԱՅԻՆ ՏՎՅԱԼՆԵՐ

Հարցերի առկայության դեպքում կարող եք դիմել՝

Հեռ.՝ +374 10 515-517, +374 10 515-514, +374 93 54 54 72  (WhatsApp) 

Էլ. փոստի հասցե՝ qayldepitun@gov.am

ՏԵՍԱՆՅՈՒԹ