Մեր գրասենյակի կողմից իրականացվող այս հավաքը կհամախմբի սփյուռքի այն մասնագետներին և կազմակերպություններին, որոնք աշխատում են Հայաստանում կանանց և աղջիկների կյանքի հզորացման և  բարելավման ուղղությամբ: Հանդիպումը տեղի կունենա Նյու Յորքում 2020 թվականի մարտի 6-ին՝ ուրբաթ օրը, առավոտյան 10-ից մինչև 4-ը, այնուհետև կկայանա ընթրիք, որտեղ ավելի անկաշկանդ մթնոլորտում հնարավոր կլինի շարունակել քննարկումները: Որպես հավաքի անցկացման վայր՝ ՀԲԸՄ-ն սիրով առաջարկել է իր գրասենյակները, որոնք գտնվում են Նյու Յորքի 55 E 59th St, New York, NY 10022 հասցեներում:

Հաշվի առնելով Հայաստանում կանանց և աղջիկների կենսակերպի բարելավման ուղղությամբ սփյուռքի կողմից իրականացվող նախաձեռնությունների բազմազանությունը՝ մենք այս հանդիպման համար նախանշել ենք 3 նպատակ.

1. Յուրաքանչյուր իրականացվող նախաձեռնության մասին իմանալ ավելին` նպատակ ունենալով խթանելու համագործակցության ընդլայմանն ու գործընկերային հարաբերությունների ակտիվացմանը,
2. Ինչպես ֆինանսական, այնպես էլ մարդկային ռեսուրսների կիրառման առավել արդյունավետ մեխանիզմների մշակում՝ խուսափելով ներդրվող ջանքերի կրկնությունից,
3. Սփյուռքի՝ Հայաստանի զարգացմանն ուղղված աշխատանքների  ներդաշնակեցում  Հայաստանի կառավարության կողմից մշակված զարգացման ռազմավարական դրույթներին:

Այնուհետ շաբաթ օրը՝ մարտի 7-ին, ՀԲԸՄ-ն կանցկացնի իր առաջին` «Կանայք ձևավորում են աշխարհը» խորագրով համաժողովը, որը հաղորդակցման, գաղափարների փոխանակման և ոգեշնչման հարթակ կտրամադրի այն կանանց, ովքեր իրենց կարիերայի, քաղաքացիական կամ բարեգործական աշխատանքի շնորհիվ տեղական կամ համաշխարհային մակարդակով արմատական  փոփոխություններ են իրականացրել: Լրացուցիչ տեղեկությունների կամ մասնակցության համար խնդրում ենք բացել այս հղումը: