Իսպանիա աշխատանքային այցի շրջանակներում Գլխավոր հանձնակատար Զարեհ Սինանյանն այցելել է Սանտա Կոլոմայի «Այբ» մեսրոպատառ կիրակնօրյա հայկական դպրոց, որը գործում է «Արարատ» միությանը կից։ Միության ղեկավար Սարգիս Հակոբյանի ուղեկցությամբ՝ Գլխավոր հանձնակատարը շրջել է դպրոցում, ծանոթացել գործունեությանը և ուսուցչական անձնակազմին։ Այնուհետ հանդիպում է տեղի ունեցել տեղի հայ համայնքի ներկայցուցիչների հետ։ «Արարատ» միության ղեկավար, 2021-2022 թթ․ Իսպանիայում սփյուռքի երիտասարդ դեսպան Սարգիս Հակոբյանը կարևորել է Գլխավոր հանձնակատարի այցը և նշել, որ համայնքը համեմատաբար նոր է ձևավորվել, սակայն կարողանում է աշխատել համախմբված, լինել ակտիվ և կանգնել հայրենիքին կողքին։ Նա հատկապես առանձնացրել է Կատալունիայի խորհրդարանի կողմից Հայոց ցեղասպանության հիշատակի օր անցկացնելու փաստը՝ որպես համայնքի համար մեծ ձեռքբերում։ 2022-2023 թթ․ Իսպանիայում սփյուռքի երիտասարդ դեսպան, «Հայ աղջիկները Կատալոնիայում» ասոցիացիայի նախագահ, «AGBU YP Barcelona»-ի փոխնախագահ Անի Բայաթյանը, խոսելով գրասենյակի ծրագրերի մասին, հատկապես առանձնացրել է «Սփյուռքի երիտասարդ դեսպան» և ՀՀ կառավարման համակարգում սփյուռքահայ մասնագետների «իԳործ» ծրագրերը, որոնց շրջանակներում ձեռք բերած նոր կապերի շնորհիվ մեկնարկել է մի շարք նախաձեռնություններ։ Գլխավոր հանձնակատարը իր երախտագիտությունն է հայտնել համայնքի ներկայացուցիչներին ներդրած ջանքերի և աշխատանքի համար, խոսել սփյուռքի հետ գործակցության, ծրագրերի և ռազմավարական ուղղությունների մասին։ Հարցեր են հնչել սփյուռքահայ ուսուցիչների վերապատրաստումների, դասավանդման մեթոդիկաների, սփյուռքահայ պատանիների «Քայլ դեպի տուն» ծրագրի տարիքային շեմը նվազեցնելու, գրասենյակի ծրագրերին և Ազգային երիտասարդական համաժողովին մասնակցության վերաբերյալ։