ՀՀ սփյուռքի գործերի գլխավոր հանձնակատար Զարեհ Սինանյանն ընդունել է Հայաստանի Հանրապետությունում Ավստրալիայի արտակարգ և լիազոր դեսպան Ջոն Գիրինգին (նստավայրը՝ ք․ Մոսկվա)։

Գլխավոր հանձնակատարը հանդիպման սկզբում իր ցավակցություն է հայտնել Սիդնեյի առևտրի կենտրոնում տեղի ունեցած ողբերգական դեպքի կապակցությամբ՝ շուտափույթ ապաիքնում մաղթելով տուժածներին։

Ողջունելով դեսպանին՝ Զարեհ Սինանյանն բարեմաղթել է նրան հաջող գործունեություն ՀՀ-ում Ավստրալիայի դեսպանի պաշտոնում։

Կարևորելով հայ համայնքի դերակատարումը հայ-ավստրալիական հարաբերությունների հետագա զարգացման գործում՝ Գլխավոր հանձնակատարը խոսել է այս տարվա փետրվարին Սիդնեյ և Մելբուռն կատարած իր այցերի և տեղի հայ համայնքի ներկայացուցիչների հետ ունեցած հանդիպումների մասին։

Անդրադարձ է կատարվել նաև գրասենյակի ծրագրերին և դրանցում ավստրալիահայերի մասնակցությանը, սփյուռքի ներուժի ներգրավման աշխատանքներին, հայրենադարձությանը և այլ թեմաների։

Կողմերը քննարկել են նաև երկուստեք հետաքրքրություն ներկայացնող մի շարք այլ հարցեր։