Հայրենադարձության և ինտեգրման կենտրոնն ամփոփել է «Հայրենադարձության շաբաթ» խորագրով միջոցառումների շարքը:

Միջոցառումների վերջին օրվա ընթացքում՝ մայիսի 31-ին, կենտրոն է այցելել Վրաստանից ժամանած պատվիրակությունը, որի կազմում ընդգրկված են եղել Միգրացիայի միջազգային կազմակերպության (IOM) Վրաստանի ներկայացուցչության,  Վրաստանի ԱԳՆ-ի Սփյուռքի հայրենակիցների և կազմակերպությունների հետ աշխատանքների վարչության և Ներքին տեղահանվածների հարցերով նախարարության ինտեգրման և վերաինտեգրման ծառայության ներկայացուցիչները։

Հանդիպմանը ներկայացվել է Հայրենադարձության և ինտեգրման կենտրոնի գործունեությունը, քննարկվել են համագործակցության հարցեր: 

Շաբաթվա ավարտին կազմակերպվել է հայրենադարձ երեխաների այցելություն Հայաստանի պատմության թանգարան և Ազգային պատկերասրահ: Կենտրոնի աշխատակիցները մասնակցել են նաև հայրենադարձ նկարիչ, քանդակագործ Սահակ Սահակյան թանգարանի բացմանը։ 

«Հայրենադարձության շաբաթը» եզրափակվել է կապերի հաստատման երեկոյով, որը տեղի է ունեցել Երևանի շամպայն գինիների գործարանում։  Շրջայցին մասնակցել են հայրենադարձներ ԱՄՆ-ից, Ռուսաստանից, Սիրիայից, Լիբանանից, Բրազիլիայից, Ավստրալիայից, Վրաստանից և այլ երկրներից: Նրանք շրջայց են կատարել գործարանում, ծանոթացել ստեղծման և հայկական շամպայմանի արտադրման պատմությանը:

Սփյուռքի գործերի գլխավոր հանձնակատարի գրասենյակի Հայրենադարձության և ինտեգրման կենտրոնի նախաձեռնած «Հայրենադարձության շաբաթվա» ընթացքում՝ մայիսի 27-ից 31-ը, կայացել են մի շարք միջոցառումներ, այդ թվում՝ կլոր-սեղան քննարկումներ, մեծ հայրենադարձության թեմայով գրքի շնորհանդես, վարպետության դասընթացներ, առցանց և անցանց կողմնոշորիչ հանդիպում-խորհրդատվություններ, դպրոցահասակների համար շախմատի մրցաշար և այլն։ Միջոցառումներին մասնակցել են 250-ից ավելի հայրենադարձներ Արգենտինայից,  ԱՄՆ-ից, Կանադայից,  Ֆրանսիայից, Ռուսաստանից, Լիբանանից, Սիրիայից, Իսրայելից, Ուկրաինայից և մի շարք այլ երկրներից։