Սփյուռքի գործերի գլխավոր հանձնակատար Զարեհ Սինանյանը Հայաստանի ազգային ագրարային համալսարանում մասնակցել է Կոմիտասի անվան ազգային քառյակի բարեգործական երեկոյին՝ նվիրված «Վիրավոր և հաշմանդամություն ունեցող զինվորների, կամավորականների, ինչպես նաև Արցախից բռնի տեղահանվածների համար տեղեկատվական տեխնոլոգիաների ուսուցման դասընթացներ» ծրագրի վերսկսմանը։ 

Ծրագիրը կրկին մեկնարկել է Գերմանիայի արտաքին գործերի նախարարության ֆինանսավորմամբ և Սփյուռքի գործերի գլխավոր հանձնակատարի գրասենյակի, Հայաստանի ազգային ագրարային համալսարանի,  «Զինապահ» զինծառայողների ապահովագրության ազգային հիմնադրամի, «Զինվորի Տուն»  ՀԿ-ի և «Մունք» տեխնոդպրոցի աջակցությամբ:

Սփյուռքի գործերի գլխավոր հանձնակատարը միջոցառմանը հանդես է եկել ողջույնի խոսքով։ 

«Ինչպես գիտեք, ծրագիրը մեկնարկել էր դեռևս 2021 թվականին՝ հնարավորություն ընձեռելով 2020 թվականի Արցախյան 44-օրյա պատերազմում վիրավորում ստացած անձանց մասնակցել ՏՏ ուսուցման դասընթացներին, ստանալ համապատասխան գիտելիքներ ու հմտություններ հետագա աշխատանքային գործունեության մեջ կիրառելու համար: Պետք է նշեմ նաև, որ ծրագիրը հաջողությամբ իրականացվեց, և դասընթացներն ավարտած շուրջ երկու տասնյակ մասնակիցներից շատերն այժմ աշխատում են Հայաստանի տարբեր հաստատություններում», - նշել է Զարեհ Սինանյանը:

Միջոցառման շրջանակում ելույթներով հանդես են  եկել նաև Վազգեն արքեպիսկոպոս Միրզախանյանը, «Եվրոպացի և հայ մասնագետների ասոցիացիա» ՀԿ-ի նախագահ Միքայել Մինասյանն ու ՀԱԱՀ ռեկտորի պաշտոնակատար Հրաչյա Զաքոյանը։

Ուսուցման դասընթացները ներկայացվել են  ծրագրի ղեկավար Արման Խալաթյանի կողմից։ 

Միջոցառմանը ներկա են եղել ՀԱԱՀ ուսանողներն ու պրոֆեսորադասախոսական կազմը։