ՀՀ սփյուռքի գործերի գլխավոր հանձնակատար Զարեհ Սինանյանն աշխատանքային այցով գտնվում էր Ֆինլանդիայում։

Աշխատանքային այցի շրջանակներում Հելսինկի քաղաքում Գլխավոր հանձնակատարն այցելել է Հելսինկիի հայկական «Գիտունիկ» մեկօրյա դպրոց, որտեղ հանդիպել է դպրոցի ղեկավար կազմի և մանկավարժների հետ։ Հանդիպման ընթացքում քննարկվել են համայնքային կրթական նախաձեռնությունները, հայոց լեզվի պահպանման մարտահրավերներն ու հնարավորությունները։ Զարեհ Սինանյանը նաև շրջայց է կատարել դպրոցի տարածքում՝ ծանոթանալով դասընթացների իրականացման պայմաններին։

Գլխավոր հանձնակատարը շնորհակալություն է հայտնել մանկավարժներին և համայնքի ներկայացուցիչներին՝ սերնդեսերունդ ազգային ինքնության պահպանման գործում դրսևորած նվիրումի և հետևողական աշխատանքի համար։

Սեպտեմբերի 21-ին Զարեհ Սինանյանը մասնակցել է Ֆինլանդիայի հայ համայնքի և Ֆինլանդիայում Սփյուռքի գործերի հանձնակատար Դանիել Դավթյանի նախաձեռնությամբ կազմակերպված Հայաստանի Հանրապետության անկախության օրվան նվիրված միջոցառմանը, որտեղ հանդես է եկել շնորհավորական և ողջույնի խոսքով՝ ընդգծելով անկախության և պետականության կարևորությունը։

Միջոցառման ավարտից հետո Գլխավոր հանձնակատարը հանդիպել է համայնքի ներկայացուցիչների հետ, որի ընթացքում ներկայացրել է Սփյուռքի գործերի գլխավոր հանձնակատարի գրասենյակի գործունեությունն ու ընթացիկ ծրագրերը՝ առանձնահատուկ կարևորելով հայրենադարձության խթանման, սփյուռքի ներուժի ներգրավման և Հայաստան–Սփյուռք համագործակցության խորացման ուղղությամբ իրականացվող աշխատանքները։

Հանդիպման ավարտին Զարեհ Սինանյանը հավաստագրեր է հանձնել սփյուռքահայ երիտասարդներին՝ սպորտի ոլորտում արձանագրած ձեռքբերումների և հաջողությունների համար։