ՀՀ սփյուռքի գործերի գլխավոր հանձնակատար Զարեհ Սինանյանն աշխատանքային այցով գտնվում էր Դանիայում։

Աշխատանքային այցի շրջանակներում Բրոնդբի համայնքում Զարեհ Սինանյանը հանդիպել է համայնքի ավագանի, Դանիայի Սոցիալիստական ժողովրդական կուսակցության անդամ, Սոցիալական և առողջապահական հանձնաժողովի նախագահ Հայկ Զանազանեանի (Hajg Zanazanian) հետ։

Հանդիպման ընթացքում կողմերը քննարկել են համայնքային կառավարման առանձնահատկությունները, սոցիալական և առողջապահական ոլորտում առկա փորձը, ինչպես նաև համայնքային կյանքի զարգացմանն ուղղված ծրագրերն ու տեղի հայ համայնքի ներգրավման հնարավորությունները։

Գլխավոր հանձնակատարը և Հայկ Զանազանեանը շրջայց են կատարել համայնքապետարանի շենքում՝ ծանոթանալով կառույցի գործունեությանը, իրականացվող ծրագրերին և մատուցվող ծառայություններին։

Նույն օրը Սփյուռքի գործերի գլխավոր հանձնակատարը հանդիպել է Դանիայի խորհրդարանի (Ֆոլքեթինգ) անդամ Սյուրդուր Սկաալեի (Sjúrður Skaale) հետ։ Կողմերը քննարկել են Հայաստան–Դանիա երկկողմ հարաբերությունների զարգացման հեռանկարները, Դանիայում բնակվող հայերի ներուժի առավել արդյունավետ ներգրավման հնարավորությունները, ինչպես նաև հայ համայնքի ինտեգրման և ազգային ինքնության պահպանման հարցերը։

Աշխատանքային այցի շրջանակում Զարեհ Սինանյանը Կոպենհագենում հանդիպել է տեղի հայ համայնքի հետ։ Հանդիպումը կազմակերպվել էր Դանիայում Սփյուռքի գործերի հանձնակատար Աննա Կարապետյանի նախաձեռնությամբ։ Գլխավոր հանձնակատարը համայնքի ներկայացուցիչներին ներկայացրել է Սփյուռքի գործերի գլխավոր հանձնակատարի գրասենյակի գործունեությունն ու ընթացիկ ծրագրերը՝ կարևորելով սփյուռքահայության ներգրավվածությունը Հայաստանի զարգացման գործընթացներում։ Զարեհ Սինանյանը պատասխանել է համայնքի ներկայացուցիչների հարցերին՝ ընդգծելով հայրենիքի և սփյուռքի փոխադարձ կապերի ամրապնդման կարևորությունը։

Օրվա ավարտին Սփյուռքի գործերի գլխավոր հանձնակատարը մասնակցել է Կոմիտասի ծննդյան տարեդարձին նվիրված տոնակատարությանը և համերգին։ Միջոցառման ընթացքում երաժշտական կատարմամբ հանդես է եկել Արգենտինայից ժամանած հայազգի դուդուկահար Գագիկ Գասպարյանը։