«Հայաստանն իմ տունն է: Ես Հայաստանինն եմ». Ռամի Զաքարյան

17 Դեկտեմբերի 2021

 «Հայաստանն իմ տունն է: Ես Հայաստանինն եմ»:

Եգիպտոսում ծնված և մեծացած Ռամի Զաքարյանի հայրը հայ էր, իսկ մայրը՝ ղպտի։ Իր հայկական արմատների մասին նա առաջին անգամ իմացավ ընկերոջ հետ սրճարանում զրուցելիս, երբ ընկերը նկատեց, որ նրա ազգանունը հայկական հնչողություն ունի:

Ռամին լսել էր, որ պապիկը եգիպտացի չէր, սակայն հստակ չգիտեր, թե ինչ ազգության էր նա պատկանում: Ահա այդպես որոշեց այցելել Եգիպտոսի հայկական եկեղեցի և փնտրել իր ազգանվան մասին որևէ տեղեկություն։ Պարզվեց, որ իր պապը ծնվել է Եգիպտոսում 1904 թվականին, իսկ ընտանիքը գաղթել է Տիգրանակերտից։

Այս բացահայտումը նոր էջ բացեց Ռամիի կյանքում: Նա ավելի խորացավ իր հայկական արմատների մեջ և սկսեց հետաքրքրվել հայրենիքով: Առցանց ծանոթացավ իր կնոջ հետ և ընդլայնեց իր հայկական շրջանակը։

Երբ 2014 թվականին Ռամին առաջին անգամ ժամանեց «Զվարթնոց» օդանավակայան, նրա կյանքի ամենահուզիչ օրն էր։ Գիտեր, որ այստեղ երջանիկ է լինելու: Դա նաև առաջին անգամն էր, որ նա անձամբ հանդիպեց իր ապագա կնոջը:

Ռամին ներկայումս աշխատում է որպես գովազդային արշավների մենեջեր Երևանի թվային շուկայի ոլորտում: Նա նաև 5-ամյա Անահիտի և 3-ամյա Սամվելի հայրն է և հույս ունի համալրել իր ընտանիքը:

Սփյուռքի Գլխավոր Հանձնակատարի Գրասենյակ Diaspora High Commissioner's Office