Ապրիլի 21-ին Սփյուռքի գործերի գլխավոր հանձնակատարի գրասենյակը հյուրընկալեց Հորդանան-Եվրոպական խորհրդարանի բարեկամության ասոցիացիայի նախագահ Խալդուն Հինայի գլխավորած պատվիրակությանը։

Ողջունելով հյուրերին՝  Զարեհ Սինանյանն ընդգծեց․ «Հորդանանը պատմականորեն եղել է հայ ազգի, Հայաստանի Հանարապետության բարեկամ երկիր և ազգ՝  ապաստան տրամադրելով Հայոց ցեղասպանությունը վերապրած բազմաթիվ հայերի։ Ինքս ճանաչում եմ հայերի, ովքեր իրենց մանկությունը անցկացրել են Հորդանանում և դրական  հուշեր ունեն  երկրի ջերմ ընդունելությունից»։

Այնուհետ Գլխավոր հանձնակատարը ներկայացրեց գրասենյակի գործունեությունը, ծրագրերը, նշեց, որ գրասենյակն աշխատակիցներ ունի նաև արաբական աշխարհից:

Հորդանանի Հաշիմյան Թագավորության Սենատի Հորդանան-Եվրոպական խորհրդարանի բարեկամության ասոցիացիայի նախագահ Խալդուն Հինան շնորհակալություն հայտնեց Զարեհ Սինանյանին ջերմ ընդունելության համար և ընդգծեց, որ Հորդանանի և Հայաստանի ժողովուրդների միջև ստեղծվել են ամուր կապեր: Նա կարևորեց Հորդանանում հայ համայնքի ներկայությունը և դերակատարությունը: