Սփյուռքի գործերի գլխավոր հանձնակատար Զարեհ Սինանյանն ընդունեց Հայաստանում Լեհաստանի Հանրապետության արտակարգ և լիազոր դեսպան Պավել Չեպլակին և դեսպանության երկրորդ քարտուղար, քաղաքական բաժնի ղեկավար Մարչին Ռուժիցկիին:

Ողջունելով դեսպանին՝ Զարեհ Սինանյանը շեշտեց հայ-լեհական հարաբերությունների կարևորությունը:

«Լեհաստանում բավականին մեծ և ակտիվ հայ համայնք կա: Մենք բարձր ենք գնահատում Լեհաստանի Հանրապետության կողմից ուկրաինահայերին օգնության տրամադրումը, ովքեր ռազմական գործողությունների հետևանքով լքել են երկիրը»,- նշեց Զարեհ Սինանյանը:

Հանդիպման ընթացքում Գլխավոր հանձնակատարը  ներկայացրեց գրասենյակի կողմից իրականացվող  հայրենադարձության, սփյուռքի քարտեզագրման, երիտասարդության ակտիվության խթանման, ինչպես նաև  ՀՀ կառավարությունում սփյուռքի մասնագետների ներգրավման ծրագրերը:

Իր հերթին դեսպան Պավել Չեպլակը խոսեց լեհական սփյուռքի հետ տարվող աշխատանքների մասին:

Քննարկվեցին երկու երկրների միջև առկա համագործակցության ուղղությունները: