Անձնական գույքի տեղափոխում
Անձնական գույքի տեղափոխում
Նախքան մշտական բնակության նպատակով ՀՀ տեղափոխվելը՝ կարևոր է տեղեկացված լինել Ձեր անձնական օգտագործման ապրանքների (գույքի, իրերի) ներմուծմանը վերաբերող որոշ առանձնահատկությունների մասին:
Նախևառաջ, պետք է տեղյակ լինեք, որ մշտական բնակության նպատակով ՀՀ տեղափոխվելիս Ձեզ հետ բերված անձնական օգտագործման ապրանքների և ավտոմեքենայի ներմուծումը կարող է իրականացվել արտոնյալ պայմաններով, այսինքն՝ առանց մաքսային վճարների, հետևյալ դեպքերում՝
- եթե Դուք ունեք ՀՀ քաղաքացիություն կամ ՀՀ հատուկ կամ մշտական կացության կարգավիճակ,
- եթե Դուք մինչև վերոհիշյալ փաստաթղթերի տրամադրումը նախորդող 1825 օր (5 տարի) ժամանակահատվածում առնվազն 915 օր բացակայել եք Հայաստանի Հանրապետությունից,
- եթե Դուք նախկինում չեք օգտվել նշված արտոնությունից, այսինքն՝ ՀՀ չեք ներմուծել անձնական օգտագործման ապրանքներ և ավտոմեքենա առանց մաքսային վճարների վճարման:
Որպեսզի կիրառվեն անձնական օգտագործման ապրանքների ներմուծման մաքսային արտոնությունները, Ձեզ հետ կարող եք վերցնել առանց գործարանային փաթեթավորման և պիտակավորման անձնական օգտագործման, ինչպես նաև ընտանեկան, տնային ու այլ կարիքների համար նախատեսված ապրանքները, բացառությամբ՝ ձեռնարկատիրական գործունեության իրականացմանն առնչվող ապրանքների:
Առանց մաքսային վճարների ներմուծվող անձնական օգտագործման ապրանքների ու գույքի ցանկը ներառում է.
- կենցաղային և անձնական օգտագործման սարքեր` յուրաքանչյուր տեսակից 3-ական օրինակ
(սառնարան, հեռուստացույց, լվացքի մեքենա և այլն),
- կահույք` յուրաքանչյուր տեսակից մեկ լրակազմ
(ննջասենյակի, խոհանոցի, հյուրասենյակի),
- անձնական օգտագործման տրանսպորտային միջոց
(ավտոմեքենա, մոտոցիկլետ և դրանց կցորդներ՝ յուրաքանչյուրից մեկական օրինակ, որը, ՀՀ ներմուծելիս, մշտական բնակության տեղափոխվող անձի բնակության նախկին երկրում հանդիսացել է վերջինիս միանձնյա սեփականությունը գնված և հաշվառված (գրանցված) է եղել տվյալ անձի անունով առնվազն վեց ամիս առաջ ու առկա է դա հաստատող փաստաթուղթ):
- Անձնական գործածության այլ իրեր և տնային գույք՝ առանց քանակական սահմանափակումների (հագուստ, սպասք, գրքեր և այլն)։
Անհրաժեշտ փաստաթղթերի ցանկ
Փաստաթղթերը, որոնք անհրաժեշտ են Ձեզ այս գործընթացը սկսելիս.
- Դիմում ՀՀ ՊԵԿ Մաքսային ծառայության պետի անունով (կցելով ներքոհիշյալ փաստաթղթերը (լրացվում է տեղում),
- Մանրամասն գույքագրում՝ ապրանքների անվանման, քաշի, քանակի մասին՝ ներառյալ արժեքները (ապրանքների ցուցակ, հաշիվ-ապրանքագիր),
- Անձնագրի պատճենը կամ ՀՀ-ում մշտական բնակության իրավունքը հաստատող փաստաթուղթը՝ կացության քարտ, կամ փախստականի, հարկադիր տեղահանվածի կարգավիճակը հաստատող ՀՀ կառավարության լիազոր մարմնի տրամադրած փաստաթուղթը,
- Օտարերկրյա (ելքի) պետությունում մշտական բնակության փաստը հաստատող փաստաթուղթը (անձնագիր, կացության քարտ, այլ փաստաթուղթ՝ միջազգային վավերացմամբ /ապոստիլ/, կամ ՀՀ հյուպատոսական վավերացմամբ),
- Բեռնափոխադրող ընկերության հետ կնքված գույքի տեղափոխության պայմանագրի և վճարման անդորագրի բնօրինակը,
- Անձնական օգտագործման տրանսպորտային միջոց ներմուծելիս` օտարերկրյա (ելքի) պետության լիազոր մարմնի կողմից տրամադրած՝ տվյալ տրանսպորտային միջոցի՝ ֆիզիկական անձի անունով գրանցման և սեփականության փաստը հաստատող փաստաթղթերը,
- Հայաստանի Հանրապետություն մշտական բնակության տեղափոխման փաստի ճանաչումը հաստատող փաստաթուղթ` ՀՀ Ոստիկանության անձնագրային և վիզաների վարչությունից։
Օտարերկրյա պետությունների կողմից տրված փաստաթղթերը, բացի անձնագրից, ներկայացվում են ապոստիլով, նոտարական կարգով վավերացմամբ կատարված թարգմանությամբ։
ՀՀ-ում մշտական բնակության տեղափոխվող անձը պետք է ունենա հաշվառում որևէ հասցեում։
Դիմումի ընթացքը
Փաստաթղթերը ստանալուց հետո անձը կարող է դիմում ներկայացնել ՀՀ մաքսային մարմիններին` ինչպես թղթային, այնպես էլ էլեկտրոնային եղանակով` ուղարկելով ՀՀ պետական եկամուտների կոմիտեի պաշտոնական հասցեին (secretariat@petekamutner.am) կամ այցելելով Արարատյան Մաքսատուն-Վարչություն՝ Ծով.Իսակովի պող.10, Երևան 0082, կամ Պետական Եկամուտների կոմիտե՝ Մովսես Խորենացու 3, 7, Երևան 0015 հասցեով:
Մաքսային մարմինը դիմումին ընթացք է տալիս նաև այն պարագայում, եթե չի ներկայացվել ՀՀ-ում մշտական բնակության փաստի ճանաչումը հաստատող փաստաթուղթը:
Փաստաթղթերն ուսումնասիրելուց հետո մաքսային մարմինը մի քանի աշխատանքային օրվա ընթացքում (առավելագույնը 10 օր, եթե մշտական բնակության փաստի ճանաչումը հաստատող փաստաթուղթը ԱՎՎ-ից պահանջում է մաքսային ծառայությունը) թույլատրում է առանց մաքսային վճարների վճարման հայտարարագրել անձնական օգտագործման ապրանքները, նաև տրանսպորտային միջոցը կամ մերժում է, եթե չեն պահպանվել օրենքի պահանջները:
Ուշադրություն՝
- Նախկին բնակության երկրից Եվրասիական տնտեսական միության մաքսային տարածք (որի կազմում է ՀՀ-ն) ներմուծում կարելի է իրականացնել ոչ ուշ, քան 18 ամսվա ընթացքում` այն պահից, երբ օտարերկրյա ֆիզիկական անձը կստանա մշտական բնակության համար ՀՀ տեղափոխված անձ ճանաչելու փաստը հաստատող կամ Հայաստանում փախստականի, հարկադիր տեղահանված անձի կարգավիճակ ստանալու փաստը հաստատող փաստաթղթերը։
- Մաքսային պահեստներում գտնվող անձնական ապրանքների զբաղեցրած տարածքը վճարովի է, իսկ ավտոմեքենայի մաքսային տարածքում գտնվելը՝ (Գյումրի քաղաքում) անվճար:
- Օտարերկրյա պետությունում բնակության փաստը հավաստող փաստաթուղթ չի համարվում ՀՀ դիվանագիտական ծառայության մարմինների կողմից տրամադրված ՀՀ վերադարձի վկայականը։
Ընտանի կենդանիների տեղափոխում
Ցանկացած տեսակի ԸՆՏԱՆԻ կենդանի ՀՀ տեղափոխելու համար պետք է ունենալ թույլտվություն և անասնաբույժի կողմից առողջության վկայական, որն ապացուցում է կենդանիների կատաղություն կամ այլ հիվանդություններ չունենալու փաստը:
Դիմել՝ Սննդամթերքի անվտանգության տեսչական մարմին (ՍԱՏՄ)
Անասնաբուժության վարչություն
Հեռ․՝ +374 15 40 40 40 /220/
Էլ․ հասցե: ssfs@ssfs.am
Հասցե՝ ՀՀ, ք․ Երևան, 0051, Կոմիտասի պող․ 49/2
Ցանկացած տեսակի ՎԱՅՐԻ կենդանի ՀՀ տեղափոխելու համար պետք է ունենալ թույլտվություն և անասնաբույժի կողմից առողջության վկայական, որն ապացուցում է կենդանիների կատաղություն կամ այլ հիվանդություններ չունենալու փաստը:
Դիմել՝ ՀՀ Շրջակա միջավայրի նախարարություն
Էլ․հասցե: minenv@env.am
Թեժ գիծ՝ +374 11 8185 59
Հասցե՝ ՀՀ, ք․ Երևան, 0010, Հանրապետության հրապարակ, Կառավարական տուն 3
- Պատվաստման վկայագիր
- Անասնաբուժական առողջության վկայագիր
- Կենդանու անձնագիր
- Կենդանու լուսանկար
Կոնտակտային տվյալներ
Հավելյալ տեղեկատվության համար կարող եք դիմել մեր գրասենյակի հայրենադարձության բաժին.
Բաժնի պետ՝ Հովհաննես Ալեքսանյան
Հեռ.՝ (+37410) 51-55-32
Էլ. հասցե՝ repatriation@gov.am