Երթևեկությունը Հայաստանում

Հայաստանի Հանրապետությունում մեքենա վարելու համար անհրաժեշտ է ունենալ ՀՀ ազգային կամ Վիեննայի կոնվենցիայի անդամ երկրների վարորդական վկայական:

Համաձայն «Ճանապարհային երթևեկության մասին» 1968 թ. նոյեմբերի 8-ի Վիեննայի Կոնվենցիայի՝ այն երկրները, որոնք միացել են վերոնշյալ Կոնվենցիային, դրանց քաղաքացիները կարող են Հայաստանի Հանրապետությունում տրանսպորտային միջոց վարել իրենց ազգային վարորդական վկայականներով:

Վիեննայի Կոնվենցիային միացած երկրների ցանկին կարող եք ծանոթանալ այստեղ։  

 

Գրավոր և գործնական քննություններ

ՀՀ-ում ազգային վարորդական վկայականի ձեռք բերման համար հարկ է գրանցվել գրավոր (հարցաշարը պարունակում է 1.116 հարց, որից՝ յուրաքանչյուր հարցատոմսում՝ 20 հարց, իսկ անցողիկ է համարվում հարցատոմսի առնվազն 18 ճիշտ պատասխանը) և գործնական (քաղաքային պայմաններում վարելը) քննություններին մասնակցելու համար, որը կատարվում է առցանց` roadpolice.am կայքում հայտ լրացնելով, որից հետո Դուք ստանում եք հաղորդագրություն կամ հեռախոսազանգ քննության տեղի և ժամի վերաբերյալ։

Գրավոր քննության գնահատականները Դուք կստանաք թեստային փուլի ավարտից անմիջապես հետո, ինչից հետո կարող եք դիմել գործնական քննության համար։ 

Անհրաժեշտ փաստաթղթեր և վճարումներ

Անհրաժեշտ է անձնագիրը կամ նույնականացման քարտը կամ անձը հաստատող այլ փաստաթուղթ, որտեղ նշված կլինի բնակության վայրը։

• Գրավոր քննության մասնակցության արժեքը 3000 դրամ է,
• Գործնական քննության մասնակցության արժեքը 13000 դրամ է,
• Վարորդական իրավունքի վկայականի դիմաց վճարելու եք 12000 դրամ

Այլ տեղեկություններ

Վարորդական իրավունքի նվազագույն տարիքը 18 տարեկանն է։

Հայաստանում մեքենա վարելիս մեքենայի ապահովագրությունը պարտադիր է։

Հայաստանում երթևեկության, թեստերի նմուշների, վիդեո դասընթացների և այլնի վերաբերյալ հավելյալ տեղեկությունների համար այցելեք www.police.am  կայք:

ՀՀ Ճանապարհային ոստիկանության հաշվառման և քննական ստորաբաժանումների գործառույթներին (վարորդական իրավունքի վկայական ստանալ, փոխանակել, տրանսպորտային միջոցներ հաշվառել, անվանափոխել և այլն) վերաբերող դիմումներին առավել արդյունավետ և արագ պատասխան ստանալու համար դիմումն անհրաժեշտ է ուղարկել ՃՈ հաշվառման և քննական տարածքային ստորաբաժանման էլեկտրոնային փոստի հասցեին:

Էլեկտրոնային փոստի հասցեներն են՝

Երևանի ՀՔԲ – yerevani.hqb@roadpolice.am
Կոտայքի ՀՔԲ – kotayqi.hqb@roadpolice.am
Սևանի ՀՔԲ – sevani.hqb@roadpolice.am
Կապանի ՀՔԲ – kapani.hqb@roadpolice.am
Գորիսի ՀՔԲ – gorisi.hqb@roadpolice.am
Աշտարակի ՀՔԲ – ashtaraki.hqb@roadpolice.am
Վանաձորի ՀՔԲ – vanadzori.hqb@roadpolice.am
Արմավիրի ՀՔԲ – armaviri.hqb@roadpolice.am
Արտաշատի ՀՔԲ – artashati.hqb@roadpolice.am
Իջևանի ՀՔԲ – ijevani.hqb@roadpolice.am
Մարտունու ՀՔԲ – martuni.hqb@roadpolice.am
Վայքի ՀՔԲ – vayqi.hqb@roadpolice.am
Գյումրու ՀՔԲ – gyumri.hqb@roadpolice.am

Ճանապարհային ոստիկանության ծառայության այլ գործառույթների (վարչական իրավախախտման վերաբերյալ արձանագրությունները բողոքարկել և այլն) վերաբերյալ դիմումներն անհրաժեշտ է ուղարկել info@roadpolice.am էլեկտրոնային փոստին:
Պարտադիր է նշել դիմողի կոնտակտային տվյալները:

ՄԻՋԱԶԳԱՅԻՆ ՎԱՐՈՐԴԱԿԱՆ ՎԿԱՅԱԿԱՆ

Ինչպե՞ս ստանալ միջազգային վարորդական վկայական։

Միջազգային ավտոմոբիլային երթևեկությանը մասնակցելու համար ազգային վարորդական վկայականի հիման վրա, առանց տեսական և/կամ գործնական քննությունների մասնակցելու, մեկ աշխատանքային օրվա ընթացքում տրվում է միջազգային վարորդական վկայական։

Միջազգային վարորդական վկայական ստանալու համար անձը քննական մարմին է ներկայացնում․

• անձը հաստատող փաստաթուղթ
• մեկ գունավոր լուսանկար՝ 3x4 չափսի
• վարորդական վկայական տալու համար օրենքով սահմանված պետական տուրքի վճարման անդորրագիր (12.000 ՀՀ դրամ)
• ազգային վարորդական վկայական՝ գործող։

Միջազգային վարորդական վկայականը տրվում է մինչև երեք տարի ժամկետով, բայց ոչ ավելի, քան ազգային վարորդական վկայականի գործողության ժամկետը։

ՄՈՊԵԴ ՎԱՐԵԼՈՒ ՎԱՐՈՐԴԱԿԱՆ ՎԿԱՅԱԿԱՆ

Մոպեդ վարելու համար անհրաժեշտ է վարորդական վկայականի <AM> ենթակարգ։ Մոպեդ է համարվում 50սմ խորանարդ աշխատանքային ծավալը չգերազանցող ներքին այրման շարժիչ ունեցող կամ երկարատև ծանրաբեռնվածության ռեժիմով 0,25 կիլովատտից ավելի և 4 կիլովատտից պակաս առավելագույն հզորությամբ էլեկտրական շարժիչ ունեցող երկանիվ կամ եռանիվ մեխանիկական տրանսպորտային միջոցը, որի առավելագույն արագությունը չի գերազանցում 50կմ/ժ։

Մոպեդին է հավասարեցվում նաև կվադրոցիկլը։

Այս տեսակի վարորդական վկայական կարող են ստանալ 16 տարին լրացած քաղաքացիները։