Ես Անի Սարգսյանն եմ, 22 տարեկան։ Այս տարի ավարտել եմ Սարատովի Ն.Գ.Չերնիշևսկու անվան պետական ​​համալսարանի բանասիրության և ժուռնալիստիկայի ինստիտուտը՝ լրագրության ուղղությամբ:

Դեռ դպրոցական տարիքից մշտապես ներգրավված եմ եղել համայնքային աշխատանքներում, մասնակցել եմ ազգամիջյան հարաբերությունների ամրապնդմանն ուղղված քաղաքային և մարզային տարբեր միջոցառումների:

2013 թվականից Սարատովի մարզի «Կռունկ» հայ համայնքի ակտիվիստ եմ, 2019 թվականից՝ Սարատովի Հայ երիտասարդների միության և Ռուսաստանի ժողովուրդների երիտասարդական ասամբլեայի «Մենք ռուսներ ենք» խորհուրդների անդամ։

2016-2018 թթ. եղել եմ էլեկտրոնային հրատարակության անկախ թղթակից։

Հանդիսանում եմ «Կռունկ» հայկական համայնքի SMM մենեջերը, ակտիվ մասնակցություն ունեմ նաև տարբեր ծրագրերի կազմակերպման գործում։

Սարատովի մարզում հայ մշակույթի պահպանման և զարգացման ուղղությամբ կատարածս աշխատանքի համար Սարատովի մարզի Հասարակայնության հետ կապերի ներքին քաղաքականության նախարարության կողմից պարգևատրվել եմ շնորհակալագրով։

Գլխավոր խնդիրը մեր համայնքի երիտասարդության մեջ հայ ինքնության և հայրենասիրական ոգու ամրապնդումն է։ Հայ լինելը ծանր աշխատանք է, որը պետք է իրականացնենք  խղճով ու մեծ պատասխանատվությամբ։

Որպես «Սփյուռքի երիտասարդ դեսպան» ծրագրի Ռուսաստանի Դաշնության ներկայացուցիչ՝ նպատակ ունեմ բարելավել կապը Սփյուռքի և Հայաստանի միջև, ակտիվ համագործակցել տարբեր երկրների հայ համայնքների հետ։