Մարալ Մաթիգ
Ես Մարալ Մաթիգն եմ, 24 տարեկան, ծնվել և մեծացել եմ Կանադայի Մոնրեալ քաղաքում։ Արմատներս սկիզբ են առնում Արևմտյան Հայաստանի Կեսարիա և Քիլիս քաղաքներից։
Ավարտել եմ Ջոն Աբբոտ քոլեջը՝ արվեստի, գրականության և հաղորդակցության ոլորտում, որտեղ նաև ուսումնասիրել եմ իսպաներեն, գերմաներեն և պարսկերեն։ Ստացել եմ բակալավրի աստիճան դիզայնի և հաշվողական արվեստի մասնագիտությամբ Մոնրեալի Կոնկորդիա համալսարանում՝ ուսումը կենտրոնացնելով հայկական մշակույթի պահպանման և ներկայացման վրա։
Համալսարանական տարիներին միացել եմ «Կոնկորդիա հայ ուսանողների միությանը»՝ սկզբում որպես մարքեթինգի փոխնախագահ, ապա՝ կազմակերպության ղեկավար։ Այս ընթացքում նախաձեռնել և իրականացրել եմ տարբեր համայնքային միջոցառումներ՝ հայ ուսանողներին միավորելու, հայրենասիրությունը խթանելու և մշակութային կապերը պահպանելու նպատակով։
Ներկայումս ղեկավարում եմ սեփական դիզայնի բիզնեսը, որը ներառում է ձեռագործություն, գրաֆիկական դիզայն, հայերեն տառատեսակների ստեղծում, ինչպես նաև նկարչություն և տպագրություն։ Այս գործունեությունը հնարավորություն է տալիս համագործակցել աշխարհի տարբեր հատվածներում բնակվող հայերի հետ՝ ստեղծելով մշակութային և ստեղծագործական կամուրջներ։
Որպես «Սփյուռքի երիտասարդ դեսպան» ծրագրի մասնակից՝ նպատակ ունեմ ամրապնդել Մոնրեալի հայ համայնքի ներկայությունն ու ակտիվությունը, ինչպես նաև ստեղծել ամուր կապեր հայ երիտասարդության միջև՝ Հայաստանում և Սփյուռքում։