Բարև, ես Լուսինե Էլլարյանն եմ Նիդերլանդներից, որտեղ ապրել եմ ինը տարեկանից: Ծնվել եմ Երևանում 1989 թվականին:

Ինձ միշտ գրավել է փիլիսոփայությունը: Բարսելոնայի Պապմեպու Ֆաբրայի համալսարանում ստացել եմ մագիստրոսի աստիճան քաղաքական փիլիսոփայության ուղղությամբ: Բիզնեսի կառավարման ոլորտում իմ առաջին որակավորումը թույլ տվեց ինձ զարգացնել իմ կարիերան մշակութային ծրագրերի կառավարման ոլորտում, որով ես տարված եմ: Այս ոլորտում ես աշխատում եմ շուրջ 10 տարի հիանալի արվեստագետների և կազմակերպությունների հետ Նիդերլանդներում և Իսպանիայում:

Այժմ աշխատում եմ ՀՀ կրթության, գիտության, մշակույթի և սպորտի նախարարության ժամանակակից արվեստի վարչությունում: Մենք փորձում ենք վերականգնել հայաստանյան մշակութային ոլորտը համավարակից և պատերազմից հետո:

Մարտահրավերները շատ են, բայց միասնական մոտեցմամբ, միջազգային համագործակցությամբ, վերլուծությամբ և ռազմավարական պլանավորմամբ հույս ունենք, որ կարող ենք օգտագործել մեր աննկարագրելի հարուստ ժառանգությունը և մեր ստեղծագործ ուժը ի շահ և՛ մշակութային վերականգնման, և՛ համաշխարհային նորարության մեջ մեր ներդրման:

*Լուսինե Էլլարյանը եղել է «իԳործ» ծրագրի մասնագետ մինչև 2021թ.-ի օգոստոսի 31-ը: