Սփյուռքի գործերի գլխավոր հանձնակատարի գրասենյակի «իԳործ» ծրագրի առաջին փուլի մասնակիցներն արդեն ՀՀ կառավարության կազմում են։ Պետական համակարգում աշխատանքի են անցել 100 մասնակիցներից դեռևս 24-ը։ Կորոնավիրուսի համավարակով պայմանավորված՝ մասնակիցների մի մասը Հայաստան կժամանեն ավելի ուշ։

«իԳործ» ծրագիրը նպատակ ունի Հայաստան բերել սփյուռքի մասնագիտական ներուժը, իրականացնել արտասահմանյան կրթական և աշխատանքային փորձի փոխանակում և նպաստել մասնագիտական հայրենադարձությանը։  

Այս պահին «իԳործ»-ի մասնակիցները սկսել են իրենց աշխատանքը  վարչապետի աշխատակազմում, Առողջապահության, Աշխատանքի և սոցիալական հարցերի, Շրջակա միջավայրի, Արդարադատության, Բարձր տեխնոլոգիական արդյունաբերության, Տարածքային կառավարման և ենթակառուցվածքների, Կրթության, գիտության, մշակույթի և սպորտի, Էկոնոմիկայի նախարարություններում, Կենտրոնական բանկում, Կրթության տեսչական մարմնում, Մարդու իրավունքների պաշտպանի, Սփյուռքի գործերի գլխավոր հանձնակատարի գրասենյակներում:

Առաջին աշխատանքային օրը «իԳործ»-ի մասնակիցներին դիմավորեցին կառույցների համապատասխան ոլորտների պատասխանատուները։ Նրանք ողջունեցին մասնակիցների պատրաստակամությունը և ոգևորությունը,  ծանոթացրին ընթացիկ աշխատանքներին։

Ծրագիրը տևելու է 12 ամիս, որոնց ընթացքում մասնակիցներն աշխատելու են գործող և նոր նախագծերի շրջանակներում։ Մեկ տարվա ընթացքում Սփյուռքի գործերի գլխավոր հանձնակատարի գրասենյակը սերտորեն կապ է պահպանվելու յուրաքանչյուր մասնակցի և գերատեսչությունների հետ՝ իրականացվող աշխատանքների արդյունավետությունը տեսնելու և բարելավելու նպատակով։

«իԳործ» ծրագրի մասին մանրամասներ կարող եք գտնել Սփյուռքի գործերի գլխավոր հանձնակատարի գրասենյակի կայքում հետևյալ հղմամբ՝ http://diaspora.gov.am/hy/programs/25/fellowship: