Զ. Սինանյանը հանդիպել է Համահայկական ուսանողական ասոցիացիայի ղեկավարության հետ, այդ թվում ՝ Լոս Անջելեսի Կալիֆորնիայի համալսարանի (UCLA) հայ ուսանողների ասոցիացիայի, Հարավային Կալիֆորնիայի համալսարանի (USC), Los Angeles Valley College-ի և Los Angeles Mission College-ի ներկայացուցիչների հետ: Քննարկվել են հայագիտական հետաքրքրություն ներկայացնող հարցեր, ներառյալ սփյուռքի երիտասարդության շրջանում մեդիա գրագիտության կարևորությունը: Նրանք նաև հետաքրքրություն են հայտնել Հայաստանի հետ ակադեմիական համագործակցությունն ընդլայնելու հարցում, ինչպես օրինակ՝ արտասահմանում սովորելու ծրագրերը։

Գլխավոր հանձնակատարը հանդիպել է նաև Հյուսիսային Ամերիկայի Հայ Առաքելական Եկեղեցու Արևմտյան թեմի երիտասարդների հետ, այդ թվում՝ ACYO-ի (Հայ Եկեղեցու երիտասարդական կազմակերպություն) և Ներուժի ղեկավարությանը: Զարեհ Սինանյանը երիտասարդներին է ներկայացրել գրասենյակի ծրագրերն ու գործունեությունը, պատասխանել նրանց հարցերին և քննարկել հետագա համագործակցության ուղիները։

Այցի ընթացքում Սինանյանն այցելել է ՀԲԸՄ Մանուկյան-Դեմիրճյան դպրոց, որտեղ հանդիպել է ուսանողների և դասախոսական կազմի հետ, քննարկել դպրոցի հայագիտական ծրագրերը, արևելահայերենի և արևմտահայերենի ուսուցման միջոցով հայոց լեզվի պահպանման կարևորությունը: