Գլխավոր հանձնակատար Զարեհ Սինանյանը ԱՄՆ աշխատանքային այցի ընթացքում հանդիպել է Փենսիլվանիա նահանգի Ֆիլադելֆիա քաղաքի հայ համայնքի հետ։

Նա այցելել է Հայոց ցեղասպանության հուշարձան, այնուհետ հանդիպել  «Armenian Heritage Walkway Project»-ի անդամների հետ: Նրանք այժմ աշխատում են հուշաարձանի շուրջ ճեմուղի ստեղծելու ուղղությամբ, որը կընդգծի Ֆիլադելֆիայում հայկական սփյուռքի դերը:

Գլխավոր հանձնակատարը հանդիպել է  Սբ. Սահակ և Մեսորպ, Սուրբ Գրիգոր Լուսավորիչ  և Սուրբ Մարկոս ​​Հայ Առաքելական եկեղեցիների հոգևոր առաջնորդների հետ: Հանդիպումից հետո Զարեհ Սինանյանն այցելել է Արցախյան 44-օրյա պատերազմի զոհերի հիշատակին նվիրված հուշարձան:

Հանդիպում է կայացել նաև Ֆիլադելֆիա քաղաքում գտնվող Հայ քույրերի վարժարանի ներկայացուցիչների հետ։ Կրթօջախն ունի նախակրթարանից մինչև ութերորդ դասարանի աշակերտների համար նախատեսված ծրագիր:

Ֆիլադելֆիա այցը եզրափակվել է համայնքային հանդիպմամբ, որին մասնակցել են մշակութային, քաղաքական, բարեգործական, մարզական, կրոնական և ուսանողական կազմակերպությունների անդամները։ Հանդիպմանը ներկա էին նաև Փրինսթոնի, Փենսիլվանիայի և Վիլանովայի համալսարանի հայ ուսանողներ:

Գլխավոր հանձնակատարն այցելել է ԱՄՆ քաղաքացիական պատերազմում կռված Խաչատուր Կարապետյանի գերեզմանին և ծանոթացել 1800-ականներին Ֆիլադելֆիայում հաստատված հայերի պատմությանը։