ԾՐԱԳՐԻ ՄԱՍԻՆ

ՀՀ սփյուռքի գործերի գլխավոր հանձնակատարի գրասենյակը շարունակում է իրականացնել «Սփյուռքի երիտասարդ դեսպան» ծրագիրը («Սփյուռքի երիտասարդ առաջնորդների վերապատրաստում»), որին այս տարի կարող են մասնակցել ինչպես համայնքում ակտիվ, այնպես էլ իրենց գործունեությունը նոր սկսած երիտասարդները:

Ծրագիրը նպատակ ունի հնարավորություն ընձեռել սփյուռքահայ երիտասարդներին՝ ընդլայնելու իրենց պատկերացումները Հայաստանի քաղաքական, սոցիալական, տնտեսական և այլ խնդիրների մասին, աջակցել համայնքային կյանքում նրանց առավել ներգրավմանն ու գործունեության արդյունավետության բարձացմանը՝ նոր գիտելիքների, հմտությունների, գործնական նոր կապերի ձեռքբերման, փորձի փոխանակման ճանապարհով, նպաստել Հայաստանի և Սփյուռքի տարբեր համայնքների երիտասարդների միջև համագործակցության ձևավորմանն ու զարգացմանը:

Ծրագիրը մեկամյա է. ընդգրկում է 2024 թ. սեպտեմբեր-2025 թ. օգոստոսն ընկած ժամանակահատվածը և ընթանում է երկու փուլով:

Հայաստանում կանցկացվի տասնհինգօրյա դասընթաց` 2024 թվականի սեպտեմբերի 22-ից հոկտեմբերի 7-ը, մնացյալ ժամանակահատվածը յուրաքանչյուր մասնակից ծրագրով նախատեսված աշխատանքներ կիրականացնի իր համայնքում: 

Հայաստանյան դասընթացի լեզուն հայերենն է։ Այն ունի տեսական և գործնական բնույթ։ Ներառում է դասախոսություններ, աշխատաժողովներ, հանդիպումներ, փորձի փոխանակման աշխատանքներ, ինչպես նաև այցելություններ պետական, գիտակրթական, մշակութային, հոգևոր կառույցներ և հիշատակի վայրեր, ՀՀ մարզեր:

ՄԱՍՆԱԿՑՈՒԹՅԱՆ ՊԱՅՄԱՆՆԵՐԸ

Մասնակիցները հոգում են Հայաստան ժամանման և մեկնման տրանսպորտային ծախսերը, իրենց հաշվին ձեռք են բերում ճամփորդական ապահովագրություն:

Կազմակերպիչներն ապահովում են նրանց կեցությունը, սնունդը, տեղափոխումը ծրագրի հայաստանյան հատվածի շրջանակներում, մուտքը նախատեսված վայրեր ու հաստատություններ:

Ծրագիրն իրականացվում է ՀՀ կառավարության և «Ջինիշյան» հիշատակի հիմնադրամի ֆինանսավորմամբ:

ՄԱՍՆԱԿՑՈՒԹՅԱՆ ՉԱՓՈՐՈՇԻՉՆԵՐԸ

I կատեգորիա

Սփյուռքահայ այն երիտասարդների համար, ովքեր ակտիվ գործունեություն ունեն համայնքում (1 տարուց ավելի)

Ծրագրին կարող են դիմել 20-35 տարեկան այն երիտասարդները, ովքեր՝

• առնվազն 5 տարի բնակվում են Սփյուռքում,
• տիրապետում են հայերենին (հասկանում և կարողանում են հաղորդակցվել),
• Սփյուռքի համայնքային և երիտասարդական կազմակերպությունների ղեկավարներ են կամ անդամներ, հոգևոր կառույցների ներկայացուցիչներ, համայնքի կյանքում ակտիվ ներգրավվածություն ունեցող անձինք,
• ունեն համայնքային ծրագրերի/միջոցառումների ղեկավարման և/կամ համակարգման փորձ։

Ընտրված մասնակիցները հնարավորություն կունենան դառնալու Սփյուռքի գործերի գլխավոր հանձնակատարի գրասենյակի գործընկերները համայնքներում և իրենց ներգրավմամբ կընդլայնեն Սփյուռքի երիտասարդ դեսպանների ցանցը:

Ծրագիրը հաջողությամբ ավարտած մասնակիցը կստանա «Սփյուռքի երիտասարդ դեսպան» ծրագրին մասնակցության հավաստագիր։

II կատեգորիա

Համայնքում իրենց գործունեությունը նոր սկսած սփյուռքահայ երիտասարդների համար (մինչև 1 տարի)

Ծրագրին կարող են դիմել 20-35 տարեկան այն երիտասարդները, ովքեր`

• առնվազն 5 տարի բնակվում են Սփյուռքում,
• տիրապետում են հայերենին (հասկանում և կարողանում են հաղորդակցվել),
• վերջին մեկ տարվա ընթացքում անդամակցում են համայնքային, երիտասարդական և հոգևոր կառույցներին,
• ցանկություն ունեն համայնքում իրականացնել իրենց սեփական նախաձեռնությունները և բարելավել իրենց համայնքային գործունեությունը,
• ունեն կամավորական աշխատանքի փորձ:

Ընտրված մասնակիցները հնարավորություն կունենան ծանոթանալու այլ համայնքների փորձին ու գործունեությանը՝ ձեռք բերելով գործնական հմտություններ և գիտելիքներ համայնքային կյանքի տարբեր ոլորտներում ու աշխատանքներում արդյունավետ ներգրավվածության համար:

Ծրագիրը հաջողությամբ ավարտած մասնակցին կտրվի Սփյուռքի երիտասարդ առաջնորդների պատրաստման ծրագրին մասնակցությունը հաստատող վկայական:

ԴԻՄԵԼՈՒ ԿԱՐԳԸ

2024-2025 թթ. «Սփյուռքի երիտասարդ դեսպան» ծրագրին մասնակցության շուրջ 100 հայտ է ստացվել 29 երկրից՝ Ավստրալիայից, Գերմանիայից, Ռումինիայից, Ֆրանսիայից, Հունաստանից, Սլովակիայից, Իսպանիայից, Ավստրիայից, Չեխիայից, Մեծ Բրիտանիայից, Լեհաստանից, Լատվիայից, Լիտվայից, Շվեդիայից, Բելգիայից, Նիդերլանդներից, Ուկրաինայից, Վրաստանից, Բելառուսից, Ղազախստանից, Մոլդովայից, ԱՄԷ-ից, Իրանից, Սիրիայից, ՌԴ-ից, ԱՄՆ-ից, Արգենտինայից, Չինաստանից և Հնդկաստանից: Առաջին անգամ հայտադիմումներ են ստացվել Սլովակիայից, Լիտվայից, Լատվիայից և Մոլդովայից:

Նախնական ընտրություն անցած դիմորդները հրավիրվելվել են առցանց հարցազրույցի: Ընտրվել է 30 մասնակից՝ 20 երկրից:

 

2021-Ի ՄԱՍՆԱԿԻՑՆԵՐԸ

2021 թվականի ծրագրին մասնակցեց 20 մասնակից՝ 16 երկրից՝ Կանադա, Արգենտինա, Երուսաղեմ, Լիբանան, Ռուսաստան, Վրաստան, Ուկրաինա, Բելառուս, Նիդերլանդներ, Գերմանիա, Իսպանիա, Անգլիա, Ֆրանսիա, Շվեդիա, Բելգիա, Ավստրիա:

Սփյուռքի երիտասարդ դեսպաններին ծանոթանալու համար սեղմեք այստեղ:

2022-Ի ՄԱՍՆԱԿԻՑՆԵՐԸ

2022 թվականի ծրագրին մասնակցեց 20 երիտասարդ՝ 12 երկրից՝ ԱՄՆ, Հնդկաստան, ԱՄԷ, Գերմանիա, Բելգիա, Իսպանիա, Ֆրանսիա, Բուլղարիա, Չեխիա, Ռուսաստան, Սիրիա, Ղրղզստան: 

Սփյուռքի երիտասարդ դեսպաններին ծանոթանալու համար սեղմեք այստեղ:

2023-Ի ՄԱՍՆԱԿԻՑՆԵՐԸ

2023 թվականի ծրագրին մասնակցեց 18 երիտասարդ՝ 8 երկրից՝ ԱՄՆ, Կանադա, Բրազիլիա, Ռուսաստան, Գերմանիա, Ֆրանսիա, Իսպանիա, Բելգիա:

Սփյուռքի երիտասարդ դեսպաններին ծանոթանալու համար սեղմեք այստեղ։ 

 

2024-Ի ՄԱՍՆԱԿԻՑՆԵՐԸ

2024 թվականի ծրագրին մասնակցում է 28 երիտասարդ՝ 18 երկրից՝ Ավստրալիա, Գերմանիա, Ռումինիա, Ֆրանսիա, Իսպանիա, Չեխիա, Մեծ Բրիտանիա, Լեհաստան, Լատվիա, Լիտվա, Շվեդիա, Նիդերլանդներ, Վրաստան, Բելառուս, Իրան, ՌԴ, ԱՄՆ, Չինաստան:

Սփյուռքի երիտասարդ դեսպաններին ծանոթանալու համար սեղմեք այստեղ։ 

ԿՈՆՏԱԿՏԱՅԻՆ ՏՎՅԱԼՆԵՐ

Հարցեր ունենալու դեպքում կարող եք կապ հաստատել diaspora.youthambassador@gov.am էլեկտրոնային փոստի միջոցով:

ԱՄՓՈՓ ՏԵՍԱՖԻԼՄԵՐ