ՆԿԱՐԱԳՐՈՒԹՅՈՒՆ

ՀՀ սփյուռքի գործերի գլխավոր հանձնակատարի գրասենյակն իրականացնում է սփյուռքի երիտասարդ առաջնորդների վերապատրաստման ծրագիրը:

Ծրագրի նպատակն է`

• նպաստել սփյուռքի համայնքներում երիտասարդական ներուժի առավել կազմակերպման ու համախմբման խնդրի լուծմանը, նրանցում առաջնորդի, համայնքների ղեկավարման կարողությունների և հմտությունների զարգացմանը,
• Սփյուռքի երիտասարդ առաջնորդների հետ քննարկել Հայաստանի ներքին և արտաքին քաղաքականությանը, մարտահրավերներին, համազգային շահերի պաշտպանությանն ու ան­վտանգությանը, Հայաստան-սփյուռք գործակցության ամրապնդմանն ուղղված պետական քա­ղա­քականության նոր մոտեցումներին և երիտասարդությանը հուզող խնդիրներին վերաբերող հարցեր,
• առաջարկել համայնքներում արդյունավետ կառավարման կառուցակարգերի ներդրման, երիտասարդների գործունեության ակտիվացման և Հայաստանի հետ կապերի ամրապնդման հնարավորություններ և այլն։

Ծրագրի ձևաչափը

Ծրագիրն ունի տեսական և գործնական բնույթ (դասախոսություններ, քննարկումներ, աշխատա­ժո­ղովներ, այլ):

Ծրագրի լեզուն հայերենն է։

• Ծրագրի թեմատիկ ուղղությունները
• «Առաջնորդություն, կառավարում և հաղորդակցում»,
• «Ինքնություն»,
• «Հայաստան-Սփյուռք գործակցություն»,
• «Ազգային անվտանգության հիմնախնդիրներ»,
• «ՀՀ արտաքին քաղաքականություն»,
• «Օրակարգային հարցեր»,

Այլ:

Ծրագրի առաջին օրը մասնակիցները կընտրեն ավարտական (թիմային կամ անհատական) աշխատանքի թեմաներ (դրանք կարող են ներկայացվել մասնակցի նախընտրած լեզվով):

Ծրագրի ավարտին մասնակիցներին կհանձնվեն հավաստագրեր` ավարտական աշխատանքի արդյունքի հիման վրա, նաև հաշվի առնելով մասնակցի հաճա­խե­լիու­թյու­նը ծրագրին:

Ծրագիրը ներառում է նաև այցելություններ պատմամշակութային և ժամանցային վայրեր, հանդիպումներ պետական, քաղաքական գործիչների հետ, մշակութային միջոցառումներ։

Մասնակցության պայմանները

Ծրագրին կարող են մասնակցել 22-35 տարեկան ՀՀ քաղաքացի չհանդիսացող (բացառությամբ՝ երկքաղաքացիություն ունեցող և օտարերկրյա քաղաքացիություն չունեցող, բայց տվյալ երկրում կեցության իրավունք ունեցողների) սփյուռքահայ այն երիտասարդները, ովքեր՝

• նախկինում չեն մասնակցել «Սփյուռքի երիտասարդ առաջնորդների դասընթացին»,
• Սփյուռքի երիտասարդական կազմակերպությունների ղեկավարներ են կամ դրանց ներկայացուցիչ­ներ, համայնքային կառույցների երիտասարդ ներկայացուցիչներ[1],
• ակտիվ ներգրավվածություն ունեն ինչպես համայնքային կյանքում, այնպես էլ համահայ­կա­կան ու միջազգային տարբեր ձեռնարկներում,
• վերապատրաստման դասընթացի ընթացքում ձեռք բերված գիտելիքները պատրաստ են ներդնել համայնքային խնդիրների լուծման գործում և իրենց գործունեությամբ նպաստել Հայաստան-Սփյուռք կապերի ամրապնդմանը:

Հայաստան ժամանման և մեկնման, ինչպես նաև ճամփորդական ապահովագրության ծախսերը հոգում է մասնակիցը[2], ծրագրի շրջանակներում կեցության և տեղափոխման ծախսերը` ՀՀ կառավարությունը։

[1] Յուրաքանչյուր կազմակերպություն և կառույց կարող է ներկայացնել առավելագույնը երկու երիտասարդ։

[2] Ճամփորդական ապահովագրության առկայությունը պարտադիր է:

Խնդրում ենք հաշվի առնել, որ կորոնավիրուսի համավարակի հետևանքով աշխարհում տիրող իրավիճակով պայմանավորված՝ չի բացառվում, որ ծրագիրը ենթարկվի փոփոխությունների: Հավելյալ տեղեկատվություն ստանալու համար կարող եք հետևել մեր լրահոսի թարմացումներին:

ԼՈՒՍԱՆԿԱՐՆԵՐ

ԿՈՆՏԱԿՏԱՅԻՆ ՏՎՅԱԼՆԵՐ

Հարցերի առկայության դեպքում կարող եք դիմել՝

Համահայկական ծրագրերի վարչություն

Հեռ.` 010585601 (702), 060500830

Էլ. հասցե` diasporayoungleaders@gmail.com